კურორტ ლებარდეს განაშენიანების გეგმის საჯარო განხილვა გაიმართა
მარტვილის მუნიციპალიტეტში კურორტ ლებარდეს განაშენიანების გეგმის საჯარო განხილვა გაიმართა.
საქართველოს მთავრობის გადაწყვეტილებით, კურორტ ლებარდესთვის, განაშენიანების გეგმის შემუშავება მიმდინარეობს. გადაწყვეტილების უზრუნველყოფა რეგიონული განვითარებისა და ინფრასტრუქტურის სამინისტროს დაევალა, დოკუმენტაციას კი საპროექტო ჯგუფი შპს „ბაუ დიზაინი“ამუშავებს .
პროექტის გაერთიანებული საჯარო განხილვა მარტვილის მუნიციპალიტეტის სოფელ კურზუში გაიმართა, სადაც საზოგადოება გაეცნო, როგორც ქალაქთმშენებლობითი დოკუმენტის ამ ეტაპამდე შესრულებულ სამუშაოს, ისე – სტრატეგიულ გარემოსდაცვითი შეფასების ანგარიშს.
ადგილობრივებთან ერთად განხილვას რეგიონული განვითარებისა და ინფრასტრუქტურის მინისტრის მოადგილე მზია გიორგობიანი, სახელმწიფო რწმუნებული სამეგრელოში ალექსანდრე მოწერელია და თვითმმართველობის წარმომადგენლები დაესწრნენ.
„ეს არის პროექტი, რომლის ფარგლებში კურორტის განაშენიანების პროექტი დაიგეგმება და განვითარდება. მნიშვნელოვანია ისიც, რომ გარემოსდაცვითი შეფასების ანგარიშში დეტალურად აისახება ის უნიკალური პოტენციალი, რომელიც ლებარდეს აქვს, როგორც მთის კლიმატურ-ბალნეოლოგიურკურორტ“, – აღნიშნა მზია გიორგობიანმა.
მისივე თქმით, მდგრადი განვითარების პრინციპებზე დაფუძნებული გეგმების შემუშავება აუცილებელია ყველა ტიპის დასახლებისა და პირველ რიგში, კურორტებისთვის, ქაოტური, უსისტემო განაშენიანების თავიდან ასაცილებლად, რათა შენარჩუნდეს ისტორიული იერ-სახე, მოწესრიგდეს სატრანსპორტო ქსელი და სხვა სახის ინფრასტრუქტურა.
„ახლო მომავალში საშუალება გვექნება, პროექტი წარვუდგინოთ ბიზნესს, საიდანაც დიდი დაინტერესებას ველით, რაც საშუალებას მოგვცემს განვაახლოთ ინფრასტრუქტურა და ლებარდე მიზიდულობის ცენტრი გავხადოთ არამარტო ადგილობრივი, არამედ- საერთაშორისო ვიზიტორებისთვისაც“, – განაცხადა სახელმწიფო რწმუნებულმა სამეგრელოში ალექსანდრე მოწერელიამ.
„ქალაქთმშებლობითი დოკუმენტაციის შემუშავების ფარგლებში კომპლექსურად გაანალიზდება მდგრადი განვითარების, ჯანსაღი, უსაფრთხო, მოხერხებული საცხოვრებელი და დასასვენებელი გარემოს შექმნის შესაძლებლობები. ეს, ერთი მხრივ, კურორტს შეუნარჩუნებს სარეკრეაციო და ისტორიულ ღირებულებას და ამავე დროს, ხელს შეუწყობს განვითარებას“, – აცხადებენ იფრასტრუქტურის სამინისტროში.